မြန်မာပြည်မှာ ကြပ်ပြေး ကဒါဖီကြောက်ရ
ထိုင်းရောက်တော့ ထိုင်းရဲကြောက်ရ
ဒေါက်တာလွဏ်းဘလော့ဝင်တော့
ဆောင်းပါးရှင်အက်ဆစ်ကြောက်ရ
နယူးယောက်ရောက်ပြန်တော့
အသေခံလေယာဉ်ပျံကြီးတွေကြောက်ရ
တို့သာကီနွယ်မျိုးတွေရဲ့ထိုးဇာတ်မှာ
မနှစ်က သင်္ကြန်မဏ္ဍပ်ဗုံးပေါက်တော့
ငိုယိုကြ ရင်ထုကြ
ရန်တွေ့ကြ ဒေါသထွက်ကြ
မတရားစွပ်စွဲခံ ဗုံးခွဲတရားခံတွေကို ထောင်ချတော့
လင်မယားဖက်အိပ်မပျက်ကြ
နောက်ကျခဲ့ပြီ
ကဗျာဆရာလုပ်မယ်ကြံ
ကဗျာက သေပြီဆရာဆိုတော့
ဒီဘဝမှာ ကဗျာဆရာဖြစ်ဖို့လည်း နောက်ကျခဲ့ပြီ
နောက်ကျခဲ့ပြီ
ဘဏ်ဓားပြလုပ်မယ်ကြံ
ဘဏ်တိုက်ကြီးတွေက ဗိုက်ဟောင်းလောင်းဆိုတော့
ဒီဘဝမှာ ဘဏ်ဓားပြဖြစ်ဖို့လည်း နောက်ကျခဲ့ပြီ
ကြားရတဲ့သတင်းတွေမကောင်းဘူး
မိမိကိုယ်ကို သေကြောင်းကြံစည်ခြင်းဖြင့်
သေခြင်းတရားကိုလက်ဦးမှုယူရန်
ဂျုံခင်းထဲ တောကျီးကန်းတွေလန့်ပျံသွားခိုက်
မစောတော့ဘူး ကိုခင်အောင်အေး
ဒါပေမဲ့
ဗန်ဂိုးကို မနှိုးနဲ့တော့……….
၀၃.၁၄.၂၀၁၁
No comments:
Post a Comment